तोहिच ल परही रोना | Newsforum
©द्रौपदी साहू (शिक्षिका), कोरबा, छत्तीसगढ़
परिचय- गाइडर जय भारत इंग्लिश मीडियम हाई स्कूल, जिला-कोरबा, जिला उपाध्यक्ष अखिल भारतीय हिंदी महासभा.
कोरोना कोरोना ए कोरोना।
अब तोहिच ल परही रोना।।
अबड़ेच लेहे तंय हर जान,
जम्मो ल करे तंय परसान।
गुरमेटे पन्नी म लेगे समसान,
अपन म तोला बड़ हे गुमान।
अति के अंत तो हे जरूर होना,
कोरोना कोरोना ए कोरोना।
अब तोहिच ल परही रोना।।
घेरी बेरी धोबो हाथ कइसे रहि पाबे,
मास्क लगाये हंन कइसे नाहक पाबे।
सेनेटाइज करे हंन तंय मर जाबे,
फइका देहे हंन कइसे घर आबे।
ठाने हांवन हमू तोला सरोना,
कोरोना कोरोना ए कोरोना।
अब तोहिच ल परही रोना।।
बिहिना ले उठके योगा करत हंन,
बने चुरोके काढ़ा पियत हंन।
तोर डरवाये ले अब नई डरत हंन,
खाना-पीना के धियान रखत हंन।
जतन के सफ्फा रखबो कोना-कोना,
कोरोना कोरोना ए कोरोना।
अब तोहिच ल परही रोना।।
दुनिया म अबडे़च तंय उधम मचाये,
अंठी म अपन तंय सबला नचाये।
पारी आगे तोला मजा चखाये बर,
तियार हे जम्मो टीका लगवाये बर।
कखरो म नइ चलय तोर जादू-टोना,
कोरोना कोरोना ए कोरोना।
अब तोहिच ल परही रोना।।
कोरोना कोरोना ए कोरोना।
अब तोहिच ल परही रोना।।
