होरी खेलत हे लैइका सियान | newsforum
©सरस्वती साहू, बिलासपुर, छत्तीसगढ़
होरी खेलत हे लैइका सियान
मतागे भंवरा अंगना म
झूमा झूमा जहूंरिया मितान
मतागे होरी चखना म
रंग म रंगे हे धरती आकास
पवन रंग खेलत हे
रंग बरसा होवत हे आकास
सजन रंग ठेलत हे
फागुन चढ़गे रे होगे जवान
मतागे होरी सपना म
झूमा झूमा जहूंरिया मितान
मतागे होरी चखना म…
ममहावत हे रंग गुलाल
पवन म घुरत हे
नाचे झूमे उड़ावय गुलाल
लाली लाल सूरत हे
कोनो बनत हे बपुरा नदान
मतागे होरी झरना म
झूमा झूमा जहूंरिया मितान
मतागे होरी चखना म….
नंगारा बजावय मितान
पवन सोर भेजत हे
झामे हे पारा मोहल्ला
पवन गीत छेरत हे
बरा, भजिया के नेवता मितान
मतागे होरी कोसना म
झूमा झूमा जहूंरिया मितान
मतागे होरी चखना म
होरी खेलत हे लैइका सियान
मतागे भंवरा अंगना म
झूमा झूमा जहूंरिया मितान
मतागे होरी चखना म …
