कोरोना महामारी | Newsforum
©सतीश यदु, जिला उपाध्यक्ष,
युवा यादव (ठेठवार) बेमेतरा, छत्तीसगढ़
कइसन हाहाकार माते हे
जिनगी होगे बड़ भारी।
कोरोना महामारी ल देखव संगवारी
बगरे हे गांव गली अउ दुवारी।।1।।
सर्दी बुखार माथा पीरा हे त
तुरते अस्पताल जाना हे।
कोरोना पॉजिटिव रहे ले
दवा ओखर खाना हे।। 2।।
घेरी – भेरी नाक मुँह झन छुहव
एखरो ले संक्रमण होथे।
संक्रमित मनखे ह छू दीच त
कोरोना बीमारी के बीज बोंथे।।3।।
ये बिकराल महामारी ले संगवारी
जम्मों झन बांच के रईहू।
अड़बड़ संकट के घड़ी में भईया
थोरक दुःख दरद ल सईहू।।4।।
ऐती ओती फोकट घूमना नइये
अभी तो बांच के रहना हे।
दू गज दूरी हाबय जरुरी
हमर सरकार के कहना हे।।5।।
घेरी भेरी सब हाथ धोवव जी
साबुन म बने रगड़ के।
सेनेटाइजर छींछत रहव संगी
सावधान रहव आगू बढ़के।।6।।
नाक मूहूं ल ढांक के संगवारी
संक्रमण ल हमन रोकबो।
कोरोना ल जर ले मिटाके बने
बिकट दुरिहा ऐला फेकबो।।7।।
भीड़ भाड़ के आवाजाही छोड़के
घरे म हम सबला रहे ल परही।
कोरोना ल हम मउका नई देबो त
संक्रमण बर कइसे टोर करही।।8।।
जनता के संसो करके सरकार
बड़ सुघ्घर उदीम करीस।
कोरोना वैक्सिन सब ल लगवा के
मनखे म उमंग ल भरीस।।9।।
कोरोना ले हम सबो ल बचें बर
टीका तो लगवायेच ल परही।
तभे हमर जिनगी के डोंगा ह
हांसत खेलत सुघ्घर आघू बड़ही।।10।।
ये कोरोना महामारी के परकोप ल
दू घंव कइसनो करके सहेन।
तीसर चरण के वार सहे बर
टीका लगवा के रहिबो कहेन।।11।।
सबो झन के जीव बचाय बर
कोरोना योद्धा मन लड़ीन।
आय दुःख ल हार के सुघ्घर
हम सब के पीरा हारीन।।12।।
सबो झन ले बिनती हाबय
टीका लगवाय बर झन भुलाहु।
कोरोना वायरस ले जीत के
सब मिल विजय पताका फहराहु।।13।।
कोरोना के टीका ले भरम हटाके
हम सब ला टीका लगवाना हे।
हमर छत्तीसगढ़ ल संगवारी हो।
कोरोना मुक्त कराना हे।।14।।
