नाम कमाबे | Newsforum
© महेतरु मधुकर (शिक्षक), पचेपेड़ी, बिलासपुर, छत्तीसगढ़
समस्या के अनदेखा करे ले,
समस्या के हल नई निकलय।
मऊका पाय म हालात बदल,
सुते म तो सपना नई संवरय।।
बेरा के गंवाय म केवल पसताबे,
संघर्ष कर सिरतोन नाम कमाबे……..
भाग भरोसा के हाथ दुच्छा होथे,
मेहनत के फल बड़ अच्छा होथे।
पर आसरा काम के बिगाड़ हेवय,
करमईता के कारज सच्चा होथे।।
निकता बुता कर ईनाम कमाबे,
संघर्ष कर सिरतोन नाम कमाबे……..
आलस बड़का बैरी ए जी जान ले,
चमत्कार कोनो होवय नहीं मान ले।
खुद के करम म कामयाबी मिलहि,
अपन कुगत, जांगर ल पहिचान ले।।
सुख, समृद्धि, यश तमाम कमाबे,
संघर्ष कर सिरतोन नाम कमाबे……..
