खेलवारी हे का …
©राजेश कुमार मधुकर (शिक्षक), कोरबा, छत्तीसगढ़
मैं एक महीना कस के पढ़हव
त जरूर कलेक्टर बन जाहव
अइसन बनाई हर हेंजवारी हे का
कलेक्टर बनाई हर खेलवारी हे का
मैं एक महीना कस के खेलहव
त जरूर बड़का खेलाड़ी बन जाहव
अइसन खेलाई हर खेलवारी हे का
खेलाड़ी बनाई हर खेलवारी हे का
मैं कस के एक महीना दउड़े जाहव
त जरूर बड़का पुलिस बनके आहव
अइसन बनाई हर लबारी हे का
पुलिस बनाई हर खेलवारी हे का
मैं कस के एक महीना खाहव-पीहव
त जरूर बड़का पहलवान बन जाहव
अइसन बनाई हर सुहारी हे का
पहलवान बनाई हर खेलवारी हे का
मैं कस के एक महीना नाचे लागहव
त जरूर बड़का नचइया बन जाहव
अइसन बनाई हर फुलवारी हे का
नचइया बनाई हर खेलवारी हे का
मैं कस के एक महीना परचार करहव
त जरूर बिधायक बनके रइहव
अइसन बनाई हर घर के दुवारी हे का
बिधायक बनाई हर खेलवारी हे का
मैं कस के एक महीना पईसा कमाहव
त जरूर बड़का करोड़पति बन जाहव
अइसन कमाई हर बेगारी हे का
करोड़पति बनाई हर खेलवारी हे का
मैं कस के एक महीना लिखहव
त जरूर बड़का लेखक बन जाहव
अइसन लिखाई हर संगवारी हे का
लेखक बनाई हर खेलवारी हे का
मैं कस के एक महीना सोचहव
त जरूर मन म अमीर हो जाहव
अइसन कहईया ल कोई बेमारी हे का
मन म लड्डू बनाई खेलवारी हे का
गीत, रचना, कविता, कहानी, गजल, चुटकुला, लेख, छत्तीसगढ़ी रचनाएं आदि सीधे भेजने के लिए E-mail करें – newsforum22@gmail.com या व्हाट्सएप करें : – +91 8305824440.